ROX Energy Global компаниясы «ROX Ысык-Көл» күн электр станциясынын 175 МВтп кубаттуулуктагы 1-фазасын пайдаланууга берди
Ысык-Көл, Кыргыз Республикасы, 2026-жылдын 14-июну – ROX Group холдингине кирген ROX Energy Global компаниясы Ысык-Көл облусунун Кызыл-Өрүк айылында «ROX Ысык-Көл» күн электр станциясынын кубаттуулугу 175 мегаватт-пик (МВтп) болгон 1-фазасын пайдаланууга берди. Улуттук приоритет катары таанылган бул долбоор Кыргыз Республикасынын ички электр энергия өндүрүү көлөмдөрүн арттыруу, энергетикалык коопсуздукту бекемдөө жана кайра жаралуучу энергетиканы өнүктүрүү жолундагы маанилүү баскыч болуп эсептелет.
«Ысык-Көлдүн алгачкы нуру» деген ураан астында өткөн ачылыш аземине Кыргыз Республикасынын Президенти, мамлекеттик органдардын өкүлдөрү, эл аралык өнөктөштөр, жергиликтүү тургундар, ошондой эле ата мекендик жана эл аралык бизнес-коомчулуктун өкүлдөрү катышты.
Станциянын курулушу 2025-жылдын октябрынан 2026-жылдын май айынын аягына чейин сегиз айда аяктап, инвестициянын жалпы көлөмү болжол менен 130 млн АКШ долларын түздү. Долбоор коюлган мөөнөттөн мурда бирок бардык тийиштүү техникалык ченемдерди, коопсуздук талаптарын жана сапат стандарттарын сактоо менен ишке ашырылды. Биринчи фаза жылына болжол менен 295 млн кВт/саат «таза» электр энергиясын өндүрөт деп күтүлүүдө.
Станцияда эки тараптуу монокристаллдык фотоэлектрдик модулдар, борборлоштурулган инвертордук система, чыңалуусу 110 кВ-тук көмөк чордону, ошондой эле туруктуу, коопсуз жана ишенимдүү иштөөнү камсыз кылган заманбап мониторинг жана оперативдүү башкаруу платформасы орнотулган.
ROX Energy Global Кыргыз Республикасынын Энергетика министрлиги, «Кыргызстан улуттук электр тармагы» ААКсы, Курулуш министрлиги жана башка тармактык ведомстволор менен болгон тыгыз кызматташууну жана колдоону белгилеп кетти. Бул кызматташуу курулуш ченемдерин текшерүүнү, техникалык инспекцияларды жана негизги документтерди, анын ичинде Инвестициялык келишимди жана Электр энергиясын сатып алуу-сатуу келишимин даярдоону өз убагында камсыз кылды.
«ROX Energy Global компаниясы үчүн Кыргыз Республикасынын энергетикалык коопсуздугун бекемдеп, анын «жашыл» энергетикасынын күн тартибине салым кошкон улуттук долбоорго салым кошуу чоң сыймык. Биринчи фазанын ийгиликтүү аякташы Кыргыз Республикасы менен ROX Energy Global компаниясынын ортосундагы ишенимди жана натыйжалуу кызматташууну чагылдырат. Биз кийинки фазаларды өнөктөштүк жана узак мөөнөттүү мамиленин негизинде ишке ашырууга умтулабыз».
Биринчи фаза - бул кыйла масштабдуу программанын алгачкы кадамы. Бардык этаптар аяктагандан кийин «ROX Ысык-Көл» күн электр станциясынын жалпы орнотулган кубаттуулугу болжол менен 1900 МВтка жетет. Инвестициянын болжолдуу жалпы көлөмү 1,4 млрд АКШ долларын түзүп, бир жылда 3,3 млрд кВт/сааттан ашык «таза» электр энергиясын берет.
«ROX Ысык-Көл» күн электр станциясы Ысык-Көл облусу үчүн узак мөөнөттүү социалдык-экономикалык из калтырып, жумуш орундарын түзөт, инфраструктураны өнүктүрөт жана кадрларды даярдайт. Долбоордун курулуш этабында мамлекеттик бюджетке болжол менен 321,2 млн сом которулду, ал эми толук кубаттуулукка чыкканда жылдык чегерүүлөр болжол менен 2,09 млрд сом деңгээлинде болжолдонууда.
Узак мөөнөттүү өнөктөш катары ROX Energy Global кийинки фазаларды ишке ашырууда Кыргыз Республикасынын Өкмөтү, тармактык ведомстволор жана жергиликтүү коомчулуктар менен сапат, коопсуздук жана экологиялык жоопкерчилик боюнча эл аралык стандарттарга ылайык кызматташууну улантат.
Ачылыш аземинде сүйлөгөн ROX Energy Global компаниясынын өкүлү төмөнкүлөрдү белгиледи:
«Ысык-Көлдүн алгачкы нуру» деген ураан астында өткөн ачылыш аземи Ысык-Көл облусунда биринчи жолу таза электр энергиясынын өндүрүлүшүн гана эмес, кызматташуунун, инвестициялардын жана туруктуу өсүүнүн жаңы доорун да айгинелейт. «ROX Ысык-Көл» күн электр станциясы электр энергиясын өндүргөн күндөн баштап Кыргыз Республикасынын улуттук энергетикалык приоритеттерин ишке ашырууга жана өлкөнүн туруктуу энергетикалык келечегине салым кошот.
ROX Energy Global компаниясы жөнүндө
ROX Energy Global - ROX Group инвестициялык холдингинин курамына кирген, энергетика тармагындагы эл аралык инвестициялык-девелопердик компания. Компания эл аралык рыноктордо кайра жаралуучу энергетиканын ири долбоорлорун иштеп чыгууга адистешкен. Кыргыз Республикасындагы кубаттуулугу 1900 МВт болгон «ROX Ысык-Көл» күн электр станциясы компаниянын флагмандык эл аралык энергетикалык долбоору болуп саналат.
ROX Group компаниясы жөнүндө
ROX Group - кыймылсыз мүлк, энергетика жана каржы тармактарында 30 жылдык тажрыйбасы бар жана бир катар өлкөлөрдө иш алып барган вьетнамдык көп тармактуу инвестициялык холдинг. ROX Group Вьетнамда жалпы орнотулган кубаттуулугу 522 МВт болгон күн электр станцияларын курган. Ал ROX Energy Global аркылуу стратегиялык рыноктордо өзүнүн эл аралык энергетикалык портфелин кеңейтүүдө.
